كلام

* الحكومه زودت وزارة الداخليه 9 مليار علشان الاسعار غليت ..... هيه وزارة الداخليه دى فيين ؟
* سفير اسرائيل زار متحف دنشواى ومدير المتحف طلب الكارت بتاعه ... هو متحف دنشواى فيين برضه ؟
* اهل الواحات صحيو لقوا نفسهم تبع محافظة المنيا وبعدبها هوب الجيزه وبعديها هوب بقت اكتوبر ... الدنيا قلابه ..بكره هتلاقو نفسكم فى السودان.
* نائب وطنى باعت رساله للرئيس مبارك بينصحه باقالة جمال مبارك وزكريا عزمى وعز علشان فسدو البلد ...... مفيش غيرك فسد البلد ياللى باعت الرساله .
*اكتر ناس كانو مع الاضراب الحركات ..حركة كفايه ..وحركة الاخوان ...وحركه قرعه.
*فى شارع الهرم كانو بيدهنو العواميد الفضى بلون سيلفر .. النغيير حلو..
*لحمة الحمير ماليه الدنيا .. وانا اقول الواحد مخه مقفل ليه ...
*حلوان واكتوبر بقوا محافظات ايه يعنى ما عليتنا محافظه ..

تكثيف امنى على الحدود مع غزه !!!!!! ..على فكره غزه دى كلمه عربيه مش اتوبيس لا سمح الله .. لازم كلنا نبقى مع المجاهدين فى سينا ورفح ..امال ايه .. علشان الناس بتوع غزه الوحشين خالص هيدخلوا يحتلونا وهيعملوا خط بارليف ولا خط كليك .. ولازم كلنا كمصريين نبقى ايد ورجل واحده قدام الاحتلال الفلسطينى ..اه امال ايه ... لما نخلص بقى الموضوع ده نبقى نفكر بقى فى فتح وحماس والناس اللى بتكره بعض ديه .. وممكن تلاقى فتح فى امبابه كمان يومين مدام حماس عجبها سينا ورفح .. وساعتها ربنا ينصرنا على بعض ... وبعد كده بقى يمكن تكون اسرائيل ماتت لوحدها وخلص الموضوع بتاعها ده .. المهم احنا وبلدنا اللى هتبقى محتله .. لازم نشوف العدو هنعمل فيه ايه ... حد فاهم حاجه .. او عارف هو ايه اللى بيحصل ..مش عارف ..

ضرب الاضراب

اللى ميعملش اضراب يبقى بطل ... ويبقى خايف على امن مصر .. وحاجه كده زى رأفت الهجان او محمود عبد العزيز مش هتفرق ... ابطال المحله هو اى واحد معملش اضراب وممسكش طوب .. رغيف العيش فى وسط البلد ب 60 قرش ..يعنى العيش فى الشهر نشيله بتاع 3000 جنيه كده على جنب .. ومش عارف لسه ليه الدول التانيه لما حد بيعمل اضراب مبيقولوش اللى يعمل اضراب يبقى خاين ومأجور واللى مبيعملش يبقى هيلاقى تمثاله فى اخر الشارع ..مش عارف ... كل يوم فى كل بلد البلاد فيها اضراب ..والحكومه بتحاول تستجيب ومحدش طلع فى يوم وقال الباقى ابطال ولازم يتصرفله 10 سنين مكافأه .. مش عارف ... والحل مش فى الاضراب .. الحل فى حاجه واحده .. لما الاذان بيأذن شوف الناس بتبقى فين ... وبعد كده متسألش ... هو احنا عايشين كده ليه .. اه فى اسباب وكل حاجه ..بس اعمل اللى عليك الاول مع مالك الامر كله ..

مع ان الكلام فى البلد ديه ولا بيودى ولا بيجيب ..اه والله يابنى ولا بيودى ولابيجيب ..علشان كده قولت طب مانا كمان اعمل مدونه.. هو انا صغير ؟ ...اكتع انا ؟ ..وخصوصا ان الكلام فى البلد ديه مالوش لازمه فالواحد يكتب براحته بقى ...على فكره انا مش حكومى ولا معارض . بلدنا زى جسم الانسان ولازم الواحد يبقى دكتور ...والانسان مش كله مريض ولا كله سليم ...والمشكله كلها انى لما ببص حواليه ببقى مش فاهم اى حاجه ..هو ليه ده بيحصل ...طب ومين ..طب وساكتين ليه ..طب ايه .... مش عارف لسه